Vikan!

Jæja, er ekki kominn tími á eitt örstutt blogg :). Þá er bara ein vika þangað til ég legg af stað til Íslands og ég mæti ekkert á labið þá vikuna. Hún verður nýtt í að koma ýmsu í verk sem ég hef ekki komist yfir enn þá ásamt því að þrífa, þvo, pakka og annað stúss. Ég verð reyndar frekar upptekin við að fara í kveðjupartý. Mér hefur verið boðið í fjögur farewell Fjóla party ... það má engu tap að ég sé pínu klökk ;). Það er alveg á hreinu að ég mun kveðja Berkeley með tárum. Ég mun sakna svo margs :).
Ég mætti með tvær kökur á labið í gær, tvær Fjólu special ;) og þær slógu aldeilis í gegn. Yfir kökuátinu spurði professorinn: hvenær kemur þú svo aftur? Ég: Uff, vonandi fljótlega, ég verð nú að koma fljótlega að heimsækja hundinn. P: Takk fyrir hreinskilnina Fjóla ... ætli hann hafi viljað heyra einhverja aðra ástæðu ??? hehehehe
Á morgun fer ég til San Francisco og þá trúlega í síðasta skiptið í bili ... unbelievable. Annars er Hiking tímabilið mitt byrjað aftur, var bara að koma heim úr einu. Til gamans læt ég nokkrar myndir fylgja með.

Kannski skelli ég einhverjum myndum inn á bloggið úr kveðjuhófunum, sjáum til.

Knús og kram
Fjóla

p.s.

Ég frétti það í vikunni að það væri búið að panta fyrir mig á Þjóðhátíð og að ég hefði gistingu í húsi, erum við ekki öll sammála um að ég sé ofgömul til að prófa Þjóðhátíð í fyrsta skiptið og svona í viðbót ekki týpan ;)?

Mikið grín og mikið gaman ... plús Hollywood

Vá, þetta var aldeilis stutt vika. Eyja komin og farin aftur. Það var stíf dagskrá allan tímann og komumst við því yfir mjög mikið. Fórum yfirleitt á fætur um 7 á morgnana. Já, já það þýðir ekkert minna þegar mikið er um að vera ;). Það var rosalegt stuð og mikið gaman hjá okkur vinkonunum. Það var mikið hlegið og mikið borðað, reyndar átti Eyja í einhverjum vandræðum að klára skammtana sem aftur á móti vafðist sko ekki fyrir mér.
Hér að neðan kemur ritskoðuð útgáfa af ferðasögunni í máli og myndum ... aðallega myndum ;):).

Dagur 1/Verslunardagur í San Francisco

Við hófum verslunarferðina í “gettó-inu” sem einkenndist af pissulykt og skuggalegu fólki en við fundum samt góðu búðirnar. Síðan var haldið niður í miðbæ og myndirnar segja allt sem segja þarf, held ég.

Eyja á Union square

Nokkrir pokar

Dagur 2/San Francisco skoðuð fótgangandi

Þennan dag gengum við mjög mikið og þá aðallega upp í móti og vorum ekki lítið þreyttar í fótunum eftir allar brekkurnar. Við skoðum til dæmis fjármálahverfið, ítalska hverfið, Telegraph hill/Coit Tower og Crookedest Street. Borðuðum á veitingastað sem hafði hvítlauk í öllu og mikið af honum, fórum í cable car og aðeins komið við í búðum á heimleiðinni.

Kaffibollinn minn

Dæmi um brekku

Við farnar að nálgast Coit Tower

San Francisco

Crookedest Street

Eyja og staurEyja í Cable carEyja í Kínahverfinu

Dagur 3/San Francisco aftur skoðuð fótgangandi

Gengum yfir Golden gate bridge og tilbaka aftur. Einhverja hluta vegna datt okkur í huga að labba niður að Fisherman’s Wharf frá Golden Gate. Þessi göngutúr reyndist lengri en hálft maraþon takk fyrir.

Picnic hjá Golden Gate bridge

Á röltinu

Eyja á Fisherman's Wharf

Sæljón

Við sólbrenndar

Dagur 4/Ferðalag um Norður Kaliforníu

Við leigðu bíl og keyrðum um Norður Kalíforníu og gistum í Guerneville. Það helsta sem gert var: fórum í heimsókn í Jelly Belly (sælgætisfyrirtæki), skoðuðum Napa Valley og Calistoga. Fórum í Spa í Guerneville sem var mjög áhugavert og líka mjög gott. Þetta var spa sem kallaðist "wet treatment" og var því nokkuð blautt :).

Eyja og bíllINN

Við í Jelly Belly

Napa Valley

Hótelið sem við gistum á

Dagur 5/Heimleið

Keyrðum niður eftir strandlengjunni til Berkeley. Kíktum á lífið í Sausalito. Komum aðeins við í Tilden park og hæðunum í Berkeley. Um kvöldið fórum við svo í bíó á eðalmyndina Sex and the city.

Pecific Ocean

Sausalito

Eyja í Tilden

Eyja að skoða DNA

Við á leiðinni í Bíó á Sex and the City

Við að sprella

Dagur 6/Berkeley

Seinasta deginum var eytt í Berkeley. Löbbuðum um Berkeley og stoppuðum á helstu stöðunum sem selja ómótstæðilegar kökur og enduðum á að borða á einum besta veitingastað í Berkeley sem er indverskur.

Kökur

Meiri kökur :)

Eyja á Berkeley beach

Eyja á Campus

Eyja á indverska staðnum

Hollywood

Ég frétti það síðan fyrir nokkrum dögum að ég bý í aðal Hollywood götu Berkeley. Nokkrar myndir hafa verið teknar í götunni og þessa dagana er verið að taka upp myndina “Happy tears” með Demi Moore í aðalhlutverki. Eins gott að Geogre Clooney fari að láta sjá sig hérna hehehe.

Eyja í Hollywood-götunni.

Læt þetta nægja í bili
/Fjóla

Afmæli afmæli

Til hamingju með afmælið elsku afi minni. Ég er alveg viss um að amma hefur bakað eitthvað gott handa þér í tilefni dagsins :D ... knús og kossar frá mér.

Annars er bara allt voða fínt að frétta. Ég var með svaka veislu í kvöld og ligg núna örmagna í sófanum. Ég held að uppvaskið hafi alveg gert útaf við mig hehehe. Ég er samt farin að hallast að því að ég sé á rangri hillu í lífinu. Ég hefði átt að opna veitingastað, s.s. verð kokkur og bakari ;).

Það styttist óðum í partýið sem mun standa í viku. Eyja mætir á svæðið á sunnudaginn. Ég held ég sé bara búin að setja upp program fyrir alla dagana :). Við ætlum að skella okkur í ferðalag norður og lifa eins og movie stars í tvo daga. Nágranni minni gaf mér meira að segja celebrity's sólgleraugu hehehe. Ég blogga kannski um partý-vikuna ef atburðarásin reynist vera við hæfi barna :).

Eftirvæntingarkveðja :D
Fjóla

Ég elska ...

úff, hvað ég er södd :D ... nei, ég náði ekki að klára þá alla hehehehe

This is my life!

Jminn ... við bara komin áfram í Eurovision (JÁ ÉG SAGÐI VIÐ hehehehe). Ég er virkilega sátt. Ég var með eurovision-"partý" áðan ... skellti í eðalpizzu og horfði á keppnina. Ég er samt frekar svekkt að komast ekki í alvöru eurovision-partý á laugardaginn.

Það er orðið staðfest að ég kem heim 21. júní :D ... þannig þið getið farið að panta tíma hjá mér ;). Nú þegar er búið að bóka eitt stykki vikuferðalag (innanlands) :) ... sem verður geggjað.

Ég er farin að láta fólk hérna í Berkeley vita hvenær ég yfirgef svæðið og er því misvel tekið. Ég tilkynnti karlmönnunum sem búa til kaffi Latte handa mér nánast á hverjum morgnin að það færi senn að líða að því ég myndi yfirgefa þá. Þeir urðu náttúrulega rosalega leiðir ... þeir eru svo rosalega hrifnir að mér :). Einn þeirra byrjaði að sannfæra mig um að fara ekki og eyddi dágóðum tíma í að telja upp alla kosti Berkeley. Svo loksins fékk ég kaffi-latte-ið mitt í hendurnar og þá var búið að skrifa í froðuna "We will miss U" ... ohhh, þeir eru svo yndislegir. Þeir hressa mann við ef þess þarf og koma manni á óvart með því að teikna eða skrifa eitthvað skemmtilegt í froðuna. Ég verð að fara að hafa alltaf myndavélina á mér til að geta tekið mynd af kaffibollunum til að leyfa ykkur að njóta þeirra með mér hehehehehe.

Ekki um þessa helgi heldur næstu stígur Eyja upp í flugvél vííiiiiiiiiiiiiiii og kemur til mín :D
Ég var búin að setja upp rosa program en þarf kannski eitthvað aðeins að breyta því. Það eru nefnilega skógareldar ekki svo langt frá stöðunum sem við ætluðum að fara á. Ég ætla aðeins að geyma að bóka hótel alla vega, ætla að sjá hvernig þetta þróast næstu dag.

Verð að hlaupa það er kominni pissutími hjá litlu dömunni á heimilinu :).
Kram
Fjóla

Skóli - Hiti - Páll Óskar

Víiiiiiiiiiiiii … skólinni er búinn :). Já, í dag hélt ég minni síðasta fyrirlestur takk fyrir. Það gekk bara ágætlega. Ég var eini nemandinn sem fór ekki fram yfir leyfilegan tíma. Ég átti meira segja inni nokkuð margar mínútur þegar ég lauk máli mínu. Kennarinn var hæst ángæður með það og enginn sofnað en sama geta ekki allir sagt sem töluð í dag hehehe. Ég var reyndar ekki alveg með allt á hreinu sem ég var að tala um og ákvað því að enda fyrirlesturinn á mynd frá Íslandi, sem með góðum vilja var hægt að tengja við efni fyrirlestursins. Trikkið var s.s. að professorinn og nemandur myndu frekar spurja mig út í Ísland og myndina en efni fyrirlestursins og það tókst múhahahahaha.

Í tilefni þess að skólinn kláraðist í dag ætla ég að segja ykkur eina sögu úr skólanum sem átti sér stað seinasta miðvikudag. Þennan dag kom gestafyrirlesari í faginu “Fracture mechanics”. Ég var frekar spennt fyrir þessum fyrirlestri þar sem fyrirlesarinn er heimsfrægur í þessum fræðum og eru nokkrar kenningar sem bera hans nafn. Til að valda ekki neinum usla ætla ég ekki að nafngreina þennan mann. Ég mætti tímalega og settist á minni venjulega stað, þ.e.a.s. í næstfremstu röð og tók upp glósubókina mína og beið spennt. Fljótlega koma inn aldraður, sköllóttur maður dragandi á eftir sér búnað frá fornöld. Maðurinn tók sér sinni tíma að setja upp ”græjurnar sínar” ásamt aðstoð. Í salnum voru tvær stúlkur að mér meðtalinni og um tuttugu drengir. Síðan hófst fjörið. Fyrirlesarinn skiptist á að horfa beint í augun á mér eða hinni stelpunni og sagði eitthvað á þessa leiði ”My lady, do you understand? I don’t want to keep on going unless you understand” eða ”My lady are you following? … Are you sure?” Og hann hélt ekki áfram nema sú okkar sem hann var að horfa í augun á svaraði hátt “YES, I do”. Þetta var svo óþæginlegt að ég lét mér meira að segja detta í hug að láta mig hverfa á klósettið og koma ekki til baka. Ég var bara hrædd um að hann myndi stoppa á meðan :Þ ... ég held barasta að þessi maður sé sannkallaður old school stærðfræðingur.

Annars stefnir í vatnsskort hérna í East bay og lítur út fyrir að núna megi fólk ekki vökva eða þvo bílana sína o.s.frv. Ég man heldur ekki hvenær rigndi seinast, trúlega í lok febrúar. Síðan á að vera rosalegur hiti hérna á miðvikudag og fram á föstudag og fólk sem þolir illa hita er beðið um að taka því rólega því hitinn getur farið allt upp í 100 á Fahrenheit (38°C). Ég læt það alla vega vera að fara út að hlaupa þessa daga :).

Fyrir áhugasama þá ætla ég að leggja af stað frá Berkeley 20 júní sem þýðir að ég kem til Íslands einhvern tímann á tímabilinu 21-26 júní. Svo þið getið farið að huga að móttökum ;).

Áríðandi tilkynning. Ég og Guðný ætlum að sjálfsögðu ekki að láta okkur vanta á stórtónleika Páls Óskar í Laugardalshöll 19. september. Tilefni þessa tónleika er 15 ára starfsafmæli Palla og því má búast við að hann muni taka sín allra vinsælustu lög í gegnum tíðina. Við viljum endilega fá sem felstar með okkur, þetta verður þrusu stuð. Við Guðný erum með alla textana á hreinu (að minnsta kosti ég ;)), svo stuðið verður í kringum okkur. Stelpur, hverjar eru með????????

Knús og kossar
Fjóla

Friday night dressed up in the city!!!

Síðast vika var aldeilis strembin. Alveg makalaust hvað maður getur komið miklu í verk á stuttum tíma undir pressu. Ég beitti sjálfa mig þýskum aga til að halda mér við lærdóminni :). Á föstudaginn fór ég í munnlegt próf og gekk bara svona líka vel og því ástæða til að fagna ærlega. Ég fékk barnapíu handa Daisy og skellti mér svo ásamt góðra vinahóp til San Francisco á tónleika með SF sinfóníuhljómsveitinni, síðan var farið á stað sem selur bestu eftirrétti í borginni og endað á koktelbar. Því má bæta við að þetta voru stærstu skammtar af eftirréttum sem ég hef séð á minni ævi, OMG ... og svo gott :). Þegar ég kom heim þá beið mín taugaveiklaður hundur. Haldið ekki að Daisy hafi bara verið ómöguleg meðan ”mamma hennar” lyfti sér upp. Þrátt fyrir að barnapían sé mikill vinur Daisy-jar til margra ára þá dugði það ekki til, til að gera mína sátta samt skildist mér að barnapían hafi reynt að dekra hana, fór mörgum sinnum út að labba með hana og ekkert fékk hana til að hætta að gráta. Daisy var því örmagna þegar ég kom heim sem var svo sem ágætt fyrir mig í morgunn því hún var þá aldeilis ekki á þeim buxunum að fara á fætur um áttaleytið eins og venjulega sem ég var nú mjög sátt með og sváfum því saman út :). Ég er núna að glíma við eftirköst gærkvöldsins, við ákváðum að fara í okkar fínasta púss og reima á okkur spariskóna ;). Ég skellti mér því í hina agalegu hælaskó sem fengu að fara með frá Íslandi en höfðu aldrei verið notaðir hér. Og ég sannreyndi hinn góða og gamla frasa ”beauty is pain”. Já, fæturnir á mér er svo bólgnir og blöðurnar undir fótunum minna helst á þær sem heimsins bestu langhlauparar eiga til að fá. Ég íhugaði að skella inn mynd en hætti við þegar ég áttaði mig á því að kannski væri einhver að borða meðan hann/hún skoðaði bloggið mitt :).
Þessa dagana er ég að reyna að ákveða hvenær ég ætla að láta sjá mig aftur á klakanum og hversu lengi ég eigi að stoppa í London hjá Karen. Og jú, hvort ég eigi að vera villt og skella mér í klippingu hérna :) sem minnir mig á það, að ég er ekki lengur dökkhærð ... nei, nei sólin gaf mér fría litun svo núna er ég ljós brún/rauðhærð. Ég get engan veginn sagt að ég sé sátt við þennan nýja háralit. Sólinni tókst meira að segja að upplita á mér augabrúnirnar sem hefur aldrei gerst áður.
Ég fer fljótlega að setja upp program fyrir heimsóknina miklu í júní og ákvað því að skella inn mynd af gestinum ásamt mér meðan ég var enn DÖKKHÆRÐ :Þ.
Ég ætla að láta þetta nægja í bili, ég er svo þreytt ... erfitt að vera svona gömul og fara út á lífið hihihihi
Aufwiedersehen, Fjóla

Gleðilegt sumar elskurnar mínar nær og fjær!

Rosalega er langt síðan ég hef hent einhverju hingað inn. Ástæðan fyrir því er nú bara einföld, það er og var bara brjúllet að gera :) og líka gaman. Er einhver ennþá sem kíkir hingað? (kommenta takk ;))

Hvað hefur gerst síðan síðast? Svo agalega mikið að ég nenni ekki að rita nema lítið brot. Fyrst ber að nefna að fyrir nokkrum dögum fóru frá mér yndisleg hjón sem voru búin að vera hjá mér í tvær vikur. Þau dekruðu mig, og dekruðu mig svo aðeins meira og það var voða gott og gaman :). Ég var keyrð í skólann á morgnana og svo fékk ég alltaf eitthvað gott í kvöldmat, oftast eitthvað alveg hrikalega gott :D. Þau opnuðu fyrir mér nýja matarmenningarheima ... t.d. borðaði hvítlaukskrabba með smekk og það var skuggalega gott. Því miður gleymdi ég alveg að taka myndir, á reyndar eina sæta mynd af þeim hjónum en ég tími ekki að skella henni á veraldarvefinn :).
Að öðru þá fjárfesti ég í mublu hérna fyrir alls ekki svo löngu og ég held það sé bara einn dýrasti hlutur sem ég hef keypt síðan ég kom. Hvað haldi þið að ég hafi keypt????
Að sjálfsögðu var þetta handa litla barninu mínu henni Daisy. Ég s.s. keypti handa henni nýtt rúm þar sem hún pissaði eina nóttina í aðalrúmið sitt. Hún er ekkert lítið ánægð með þetta rúm og hefur verið agalega þæg síðan hún fékk það sem er gott þar sem það er búið að vera og er svo mikið að gera í skólanum. Núna er ég loksins farin að sjá fyrir endann á þessari önn og 12/13 maí vonast ég til að vera búin með öll próf og skila öllum verkefnum. S.s. bara tvær vikur í að ég get farið að slæpast, mæta rétt fyrir hádegi á labið, taka tveggja tíma hádegismat og fara svo heim um þrjúleytið hihihi ;)
Það sem er helst að frétta úr skólanum er að ég er farin að útbúa kennsluefni fyrir einn professorinn hérna ... ég ætla rétt að vona að hann treat-i mig vel í munnlega prófinu í næstu viku fyrir vikið :).
Bíddu, bíddu ... þetta er ekki búið, ein gleði frétt svona í lokin, Æland er orðin stoltur eignandi flugmiða til mín í byrjun júní ... hversu gaman, þá vikuna verður bærinn málaður rauður, eldrauður :D!
Það bíða mín verkefni og próflestur ... verð að fara að sinna þeim.
Læt í mér heyra aftur um næstu helgi ...

Risa knús frá Ameríku
Fjóla

Páskar

Alltaf sama sagan ... tíminn flýgur enn þá áfram: Páskarnir komnir og farnir og vorfríið hefur styst heldur betur í annan endann. Páskarnir voru fínir en samt heldur ólíkir venjulegum páskum. Á páskadag var sól og blíða svona eins og íslenskur sumardagur gerist bestur. Á páskadag kom Victor yfir í mat og á boðstólnum var nautasteik og haugur af páskaeggjum ásamt Haagen Dazs ís í eftirrétt. Reyndar stóð Victor sig illa í páskaeggjaátinu, svo ég er að vinna í að borða öll þessi egg. Eins og þið getið ímyndað ykkur þá þarf ég að beita mig mikilli hörku til að koma ofan í mig súkkulaði hihihi. So far eru þetta málshættirnir sem ég er búin að fá:

Fullreynt er í fjórða sinn

Hundstungan græðir en kattartungan særir

Sæt er ávinnings vonin

Þeir eru nú allir góðir og gildir og maður reynir að hafa þá að leiðarljósi á næstunni :). Mig er farið að gruna að búið sé að slökkva á hitakerfinu í húsinu. Trúlega var slökkt á því um leið og vorið gekk í garð. Við Daisy erum því vafðar í nokkur lög af teppum á kvöldin. Eftir því sem ég best veit er farið að styttast í næstu gesti og þá hækkar hitastigið hérna inni ... svaka gaman :).

Í síðustu viku var keyrt á kött nágrannanna sem er voða sorglegt því þetta var einstakur köttur. Þau settu upp skilti í garðinum með mynd af honum og síðan nokkrum hlýjum orðum um hann til að tilkynna þeim sem eiga leið framhjá á hverjum degi að núna myndi þeirra elskulegi köttur ekki lengur fagna þeim. Þegar ég sá þessa tilkynningu íhugaði ég að stoppa og banka upp á en hætti við. Næst þegar ég labbaði framhjá þá voru nokkrir búnir að setja blóm við myndina og bréf og þá fékk náttúrulega moral yfir að hafa ekki bankað upp á þegar ég tók eftir þessu fyrst. Ég ákvað þá að ég myndi bara skrifa eitthvað fallegt frá Daisy og leggja hjá myndinni. Ég vissi bara ekkert hvað ég ætti að skrifa og það drógst og það lengi að ég rakst á nágrannana áður. Ég reyndi að segja eitthvað fallegt við þau ... en ég skammast mín enn þá. Ég er greinilega ekki búin að aðlagast því að búa í Ameríku.

Jæja, fólk er farið að vilja blogg

Ég vil byrja á að óska gamla og “núverandi” átrúnaðargoðinu mínu Páli Óskari til hamingju með verðlaunin á íslensku tónlistarverðlaununum. Ætli hann lesi ekki örugglega bloggið mitt??????
Annars miða við fréttir frá Íslandi er bara allt í rugli, bensínverð stefnir á óendanlegt með tíma, krónan bara veikist og veikist, sem er ekki alveg nógu hagstætt. Kannski bara vitleysa að koma heim aftur ??? ;).
Amma og afi eru búin að koma í heimsókn og farin aftur. Það var alveg yndislegt að hafa þau. Á hverjum morgni beið mín heitur hafragrautur þegar ég var búin að fara út með Daisy. Við elduðum saman eða fórum út að borða á kvöldin og út að labba með Daisy og svo brölluðum við ýmsilegt annað. Þau að sjálfsögðu komu með fullt fullt af íslensku nammi og jminn hvað ég er búin að troða mikið í bumbuna hihihi. Ég fór reyndar með eitthvað af namminu í skólann og gaf krökkunum með mér á labinu. Þau áttu ekki orð yfir hvað íslenskt nammi væri gott og spurðu mig meira að segja daginn eftir: Áttu meira? Þristar og fylltar lakkrísreimar klikka aldrei. Ég hef ekki fundið fyrir heimþrá síðan ég kom hingað út fyrr en sama dag og amma og afi fóru en sem betur fer tókst mér að sofa hana af mér á einni nóttu, að minnsta kosti í bili :Þ.
Ég er komin með alveg upp í kok af heimaverkefnum og er því mjög kærkomið að það sé spring break (vorfrí) í næstu viku, það þýðir að það er frí í skólanum alla vikuna. Mér sýnist á öllu að ég þurfi að nýta það í að læra en ég þarf alla vega ekki að mæta í tíma víiiiiiiii. Ég stefni samt að því að reyna að fara út að hlaupa nokkrum sinnum í næstu viku. Ég verð að segja að mér finnst algjört rugl að þurfa að taka heilt ár af kúrsum í doktorsnámi, ómögulegt að finna nógu marga sem nýtast beint í verkefninu.
Páskarnir eru víst á næsta leyti og ég er stoltur eigandi af 11 páskaeggjum (9 númer 1 og 2 stór :D) upphaflega 14 eggjum. Ég býst við að reyna að elda eitthvað almennilegt á páskadag til að ég borði ekki bara páskaegg :D.

Annars í stuttu máli um eitthvað hvað ég hef gert/eða gerst undanfarna daga:

Farin að styrkja heimilslausa í Kalíforníu.
Búin að labba yfir Golden Gate brúna og aftur til baka.
Búin að fara í San Francisco Balletinn

Fékk í fyrsta skiptið persónulegt bréf með venjulegum póst, mun skemmtilegra en gluggaumslög ;)
Borða risa ís á Fisherman´s Wharf
Farin að rata nokkuð vel í San Francisco
Búin að prófa aðeins að versla í San Francisco lofar mjög góðu thihihi

Nokkrar svipmyndir, spurning að fara að setja upp myndasíðu!

Flottasti og sniðugasti minjagripur sem ég hef eignast, gjöf frá ömmu

Fólk á röltinu í San Francisco

Ég að hlaupa upp brekku í San Francisco í verslunarferð